اسمي خالد عرفة، بدأت رحلتي مع الموسيقى من زمان جدًا، يمكن من قبل الإنترنت ما يدخل بيوتنا. من سنة 1993، وأنا بعزف على الأورج، واشتغلت في أفراح وحفلات ومحلات كتير كعازف أورج وسوليست. في سنة 2000، قررت أسيب مجال العزف وأبدأ رحلة جديدة في التوزيع الموسيقي.
أول أعمالي الناجحة كانت مع الفنان مصطفى كامل سنة 2005 في أغنية "إزيك حبيبي"، وبعدها اشتغلت على أعمال كتير، بعضها لاقى نجاح واسع، وبعضها مر مرور الكرام.
لكن مع الوقت، بدأت أحس إن في حاجة ناقصة...
رغم النجاح الفني، كنت دايمًا حاسس إن في شيء أعمق... بدأت أبحث عن المعنى، عن الراحة، عن السلام الداخلي. ومن هنا بدأت رحلتي مع الوعي.
درست، قرأت، حضرت كورسات، وطبقت على نفسي لسنين. مكنتش بس بتعلّم، كنت بعيش اللي بتعلّمه. ومع الوقت، بدأت أشوف التغيير الحقيقي بيحصل في حياتي، داخليًا وخارجيًا.
ومن هنا، جالي إحساس قوي إن اللي عرفته ده مش المفروض يفضل جوايا بس. قررت أشارك الناس الرحلة، وأساعد أي حد نفسه يغيّر حياته من جوه لبرا. علشان كده بدأت أقدّم كورسات في الوعي، والوفرة، وتحرير المعتقدات، وبناء الذات.
النهارده، رسالتي مش بس موسيقية… رسالتي إنك تعيش بوعي، وتحب نفسك، وتحقق الوفرة اللي تستحقها — في كل جوانب حياتك.
